Summa ităque divisio de jure personārum haec est, quod omnes homĭnes aut libĕri sunt aut servi. Et libertas quidem est, ex qua etiam libĕri vocantur, naturālis facultas ejus, quod cuīque facĕre libet, nisi si quid aut vi aut jure prohibētur. Servĭtus autem est constitutio juris gentium, qua quis dominio aliēno contra natūram subicĭtur. Servi autem ex eo appellāti sunt, quod imperatōres captīvos vendĕre jubent ac per hoc servāre nес occidĕre solent: qui etiam mancipia dicti sunt, quod ab hostĭbus manu capiuntur. Servi autem aut nascuntur aut fiunt. Nascuntur ex ancillis nostris; fiunt aut jure gentium, id est ex captivitāte, aut jure civīli, velŭti, cum homo liber major viginti annis ad pretium participandum sese venumdāri passus est. In servōrum condiciōne nulla differentia est. In libĕris multae differentiae sunt: aut enim ingenui sunt aut libertīni.